Der Schorsch ist wieder da ...
Also, liebe Leud, da bin i wieder. Ich hoff , dass mich der e oder anere noch kennd. Es is ja scho länger Zeid her, das ich mich des lezde Mal gemeld hab. Der Rodschdifd had hal viel Arbed gemachd un auch Geld gekosd, drum isser auch nimmer gemachd worn. Aber jezd is mir verschbroche worn, dass ich uff der SPD Houmpeitsch, wie des auf neudeudsch hässd, mei eichene Rubrig griech und schreib döff, was mir so eifälld über die Bolitg.
Und da is mir zum Beischbiel der neue Radwech vo Reicheberch nach Lindflur eigfalle. Der soll demnächsd ganz groß eröffned wern. Unner Bardei, die SPD, had scho vor mehr als 10 Jahr en solchene Radwech vorgeschlache, den ham aber de Schwarze damals gar ned mach woll. Jezd läsd sich der Bürchermesder für die Leisdung a no groß feier.
Des erinnerd mich a an die Gschichd mid der Ganzdachsschul in Bayern. Ersd had die CSU Zeder un Mordio geschrie, als wär des Unnergang von Abendland - jezd verkünne se schdolz, dass scho e paar Brozend von de Schule als Ganzdachsschule eigericht sin un es noch mehr werrn soll (aber nur wenns Geld langd).
Merkt ihr was? Wenn mehr CSU wähld, griechd mer des Gleiche wie wenn mer SPD wähld, blos hald 10 Jahr schbäder. Dere schdinkds blos das sie ned die Idee ghabd ham, dann wird’s erst emal abgelehnd un dann späder als eichene Idee der Leut verkäfd.
Also, nix für ungud,
Euer Schorsch